Ben Emmerson, avokat i Kadri Veselit, ka folur për varrezat masive të Serbisë, derisa Gjykata Speciale po diskuton konferencën për ecurinë e çështjes.

Ai thotë se Ushtria Çlirimtare e Kosovës ka qenë lëvizje popullore spontane dhe e organizuar në mënyrë minimale për të mbrojtur popullatën civile nga kriminelët serbë.

“Më shumë se 10 mijë civilë janë vrarë nga forcat e kombinuara serbe, në masakra të planifikuara. Shqiptarët u varrosën nëpër varret masive nga forcat serbe dhe shumë pastaj u zhvarrosën dhe ka shumë të tjerë të cilët trupat e tyre gjenden në Serbi, dhe janë fshehur atje. Janë quar me kamionë dhe janë varrosur atje”, është shprehur Emmerson.

Aktualisht është në pauzë 30 minutëshe konferenca për ecurinë e çështjes. Portali arbresh.info do të transmetojë edhe pjesën e dytë të kësaj konference në të cilat po marrin pjesë të gjitha palët e përfshira, gjykata, prokuroria, mbrojtja dhe të akuzuarit.

Së fundi, janë zbuluar edhe disa gjetje mortore në Kizhevak të Rashkës, dhe dyshohet se bëhet fjalë për viktima nga lufta e fundit në Kosovë.

Pala serbe ka propozuar zhvarrosjen në pranverë, për shkak të kushteve atmosferike./arbresh.info/